Dumondas e respostas

Tge èn las mesiras pussaivlas ed ils resultats dal program da realisaziun? Tge vegn elavurà en quest project?

• Access a la rait tranter las branschas
• Collavuraziun entaifer la rait
• Transfer da savida e cussegliaziun en la rait e tras partenaris externs
• Cumpass; orientaziun cuminaivla ed analisa da l'essenzialitad
• Tracking tranter ils partenaris
• Communicaziun da las prestaziuns da persistenza dals partenaris internamain sco er sin il martgà

Tge plivalur porta ina participaziun activa a quest project?

• Emprender en la rait, collavurar, crear relaziuns, barat d'experientschas
• Elavuraziun cooperativa da soluziuns per dumondas d'impurtanza surordinada che na pon betg vegnir dumagnadas persul
• Gidar a furmar activamain il futur da la marca regiunala, contribuir uschia er a l'identitad dal Grischun e promover il project da pionier
• Maximalisaziun dal niz individual cun in'investiziun minimala
• Rolla da precursur ed impuls en il dialog da persistenza
• Participar al dialog da persistenza en il Grischun e augmentar l'acceptanza dals concepts e da las mesiras elavuradas

Co pon ils partenaris gidar a concepir il project? 

Ils partenaris dal program da realisaziun han las suandantas pussaivladads:

• Cooperaziun en gruppas da lavur (collavuraziun a champs d'acziun) e prestar uschia il transfer central da la pratica
• Participaziun a lavuratoris, a sesidas ed ad occurrenzas da la rait
• Cussegliar in partenari en il program da realisaziun u vegnir cusseglià
• Interacziun en la rait tranter las branschas e svilup cuminaivel da soluziuns

Datti criteris da persistenza che qualifitgeschan partenaris da prender part? Tge capita cun partenaris/licenziataris da la marca graubünden che na sa tegnan betg vi da las finamiras da persistenza?

En il rom dal champ d'acziun «Cumpass» vegn il program da realisaziun a sa deditgar a questa dumonda. Pretensiuns futuras als partenaris da la marca graubünden en il sectur da prestaziuns da persistenza vegnan elavuradas d'ina gruppa da lavur dal program da realisaziun. Latiers tutgan devisas definidas sco er in mecanissem ch'è lià vi da l'observaziun/inobservaziun da las directivas.

En il senn d'ina chapientscha da transfurmaziun vegn la voluntad actualmain messa avant il stadi actual dal svilup da la persistenza d'in partenari. Relevants èn l'engaschament dals partenaris ed ils progress individuals. En quest senn èn tut ils partenaris da la marca graubünden envidads da sa participar a quest program da realisaziun.

Tgi po daventar partenari dal program da realisaziun?

Da princip ed en emprima lingia mintga licenziatari/sublicenziatari da la marca graubünden sco er partenari da l'offensiva da communicaziun Enavant. La recepziun d'ulteriurs partenaris vegn giuditgada da l'instituziun purtadra en cas d'interess.

Co vegn  la realisaziun dal project organisada?

Il svilup dal cuntegn tras ils purtaders previs è in element impurtant d'ina «persistenza vivida». Ils partenaris dal project èn ils purtaders e collavuran a medem temp en gruppas da lavur vi dals champs d'acziun definids (atgnas prestaziuns). Per la direcziun dal project, per la coordinaziun sco er spezialmain per la collavuraziun tematica dal project è previsa ina plazza a temp cumplain che sa chatta tar l'uffici da la marca graubünden.
 

Co vegn finanzià il program da realisaziun?

Per quai è il program da realisaziun instradà sco project da la NPR. En il center da la nova politica regiunala (NPR) stat la capacitad economica duraivla da las regiuns, la garanzia e la valurisaziun da las resursas natiralas sco er la solidaritad sociala e la participaziun da las acturas e dals acturs regiunals. L'instituziun responsabla dal project sto sa participar al project cun contribuziuns en daner e cun atgnas prestaziuns. Il chantun promova en il rom da la NPR projects cun contribuziuns à fonds perdu da 50 pertschient dals custs imputabels. Uschia vegn la contribuziun da l'instituziun responsabla (partenaris) dal program da realisaziun redublada.

Quant ditg dura il project da NPR resp. il program da realisaziun «Persistenza marca graubünden»?

Il program da realisaziun è concepì per trais onns. Tut ils contracts (cun purtaders e cun partenaris da realisaziun externs) vegnan concepids per trais onns. 

S'obligheschan partenaris stringentamain per ina participaziun durant l'entira durada dal project? U datti ina clausula da sortida?

Ils contracts da partenadi èn concepids per l'entira durada dal program da realisaziun, pia per trais onns. Ina sortida anticipada è pussaivla en cas motivads (p.ex. forza superiura, nunobservaziun/nunadempliment da las prestaziuns empermessas). 

Èsi da pajar las contribuziuns da partenari en moda unica u periodica?

Il program d'execuziun da la NPR è concepì e finanzià per trais onns, la finamira è il transferiment en in program finanzià sez. La persistenza n'è ultra da quai betg in'acziun unica, mabain in curs permanent. Las contribuziuns da partenari ston perquai vegnir pajadas annualmain. Ina sortida durant il program è pussaivla en cas motivads.

Tge capita suenter la terminaziun dal project NPR?

Durant il terz onn da project giuditgescha l'instituziun responsabla la furma e la finanziaziun da in'eventuala cuntinuaziun da mesiras u da champs d'acziun dal program da realisaziun. La finamira è quella d'approfundar e d'etablir l'empermischun da la marca cun la dimensiun da persistenza a moda vardaivla.

Co sa differenziescha il program da realisaziun envers ulteriurs concepts da persistenza da partenaris da marca (p.ex. GRV)?

Grischun vacanzas promova las stentas da persistenza dals purtaders da prestaziuns turisticas. Uschia presta la branscha turistica, orchestrada da Grischun vacanzas, ina contribuziun impurtanta tenor la branscha per ils champs d'acziun da quest project NPR. Ils champs d'acziun da quest program da realisaziun sa focusseschan sin las stentas tranter las branschas e la plivalur dal sparring en la rait. 

Cun organisar il project (represchentant dals concepts da persistenza en las branschas) sin tut ils nivels dal project NPR èsi garantì che las iniziativas vegnian coordinadas cuntinuadamain. En spezial en il sectur da la communicaziun è ina coordinaziun cuntinuada da las activitads centrala. Envers ils acturs turistics è Grischun vacanzas il partenari da contact areguard projects specifics per las branschas. Ils acturs turistics pon a medem temp s'integrar activamain en il program da realisaziun da la marca graubünden e profitar da la rait sur las branschas ora.

Co sa differenziescha il program da realisaziun dal concept da persistenza envers GRV?

• GRV represchenta la branscha da turissem en il program da realisaziun "Persistenza marca graubünden".
• GRV e la marca graubünden coordineschan lur activitads regularmain e proactivamain. 
• GRV integrescha ils basegns e l'optica dal turissem en il project NPR e garantescha che las infurmaziuns relevantas da quest program da realisaziun vegnian dadas vinavant a las operaturas ed als operaturs dal turissem grischun.

Co sa differenziescha il program da realisaziun envers las strategias dal chantun (strategia da biodiversitad, AGD, strategia da clima) e da la Confederaziun (SSP 2023)?

Il project NPR preschent sa focussescha sin il rinforzament a lunga vista da la marca regiunala graubünden, approfundond e stabilind sia empermischun da marca a moda vardaivla cun la dimensiun da persistenza. Per quest intent è vegnì sviluppà quest program da realisaziun cun ils tschintg champs d'acziun strategics sco er cun l'organisaziun da realisaziun e cun il coc da l'uniun purtadra partenari (da marca). 

Uschia contribuescha la famiglia da marca graubünden ina part impurtanta a las strategias chantunalas e naziunalas che accentueschan che tuttas e tuts (la populaziun, las vischnancas, la scienza, l'economia privata e.u.v.) èn envidads da contribuir lur part per in svilup persistent.

Co sa differenziescha il program da realisaziun da la marca graubünden envers labels (Swisstainable, regio.garantie e.u.v.)?

La marca graubünden represchenta la summa da las prestaziuns excellentas che vegnan creadas qua da umans per render la regiun in lieu attractiv da lavur, da viver e da recreaziun. La marca graubünden represchenta la tenuta da valurs da sia «famiglia da marca», sviluppa projects per lung da questas valurs e transporta quest maletg vers anen e vers anora.

Labels vegnan duvrads per marcar spezialmain products – areguard la persistenza conferman labels che  criteris ecologics e socials tar la producziun da prestaziuns vegnan observads. 

Il program da realisaziun da la marca graubünden prevesa d'ademplir l'engaschament areguard la persistenza en ils champs d'acziun «cumpass» e «tracking» e da render transparent sin in metanivel lur engaschament en vista a la persistenza.