Program «graubünden persistent»
Organisaziun da project
Il biro da la marca graubünden è responsabel per la direcziun operativa dal project, l'administraziun e la coordinaziun. Ultra da quai lavura il biro en ils champs d'acziun – saja quai cun la preparaziun e l'elavuraziun ulteriura da lavuratoris, cun far scleriments, evaluaziuns u cun sviluppar propostas per gruppas da lavur.
Tanja Jacobson maina il program
En il rom d'in process da recrutaziun da plirs stgalims ha la plazza da la direcziun dal project per il program da «graubünden persistent» pudì vegnir occupada cun success il cumenzament da fanadur 2024. Per mez avust vegn la spezialista cumprovada Tanja Jacobson a cumplettar il biro da la marca graubünden sco manadra dal project.
Tgi è Tanja Jacobson?
Tanja Jacobson s'engascha cun passiun per il svilup duraivel. La prioritad ha ella sin l'elavuraziun e la realisaziun da mesiras da persistenza, sin il svilup da las regiuns sco er sin la revalitaziun da bains natirals e culturals. En quest connex èsi spezialmain impurtant ch'ins resguardia las pretensiuns ed ils basegns da las differentas gruppas d'interess sco er in proceder cooperativ. Ella dispona d'in master en scienzas da l'ambient e d'in bachelor en il turissem. Ultra da sia activitad en la perscrutaziun applitgada davart il svilup persistent en il turissem ha Tanja Jacobson docì en differents curs da studi – tranter auter a la Scola auta spezialisada Grischun – davart il tema persistenza. Sia finamira è quella da abilitar e da motivar ils umans d'extender lur cumpetenzas e da s'engaschar activamain per in svilup duraivel.
Tar il profil linkedin da Tanja.
La participaziun cooperativa dals purtaders è in element impurtant da la mentalitad d'ina «persistenza vivida». Il program stat e scroda cun la collavuraziun dals partenaris, cun il dialog e cun il barat d'experientschas en la rait sco er cun la realisaziun da mesiras en las respectivas interpresas. Ils partenaris dal program "graubünden persistent" èn ils purtaders e coopereschan a medem temp activamain – en furma d'atgnas prestaziuns – en tscherts champs d'acziun.
